Во периодот од 28 до 30 октомври 2026 година, во хотел „Парк“ во Скопје, се одржува тридневна работилница за општинско развојно планирање, наменета за општинските тимови од Желино, Росоман и Радовиш, кои се вклучени во процесот на подготовка на Интегрирани локални развојни планови (ИЛРП).
Работилницата се реализира во рамки на проектот „Јакнење на општинските капацитети за имплементација на проекти – Фаза 2“ (BMCPI – Фаза 2), поддржан од Шведска и спроведуван од Програмата за развој на Обединетите нации (УНДП), во партнерство со Министерството за локална самоуправа и Ресурсниот Центар за поддршка на развојот на општините.
Целта на работилницата е зајакнување на капацитетите на општинските тимови и координаторите од трите општини за подготовка на Интегрирани локални развојни планови, како и зајакнување на практичната подготвеност на назначените претставници на Министерството за локална самоуправа и Ресурсниот центар за поддршка на општините за преземање на клучните функции согласно методологијата за подготовка на ИЛРП.
Во текот на тридневната работилница учесниците се запознаваат со процесот и методологијата за подготовка на ИЛРП, а преку презентации, дискусии и практична работа во групи стекнуваат знаења и вештини за примена на методолошките насоки.
Очекуван резултат од работилницата е учесниците да се воведат во процесот на изработка на Интегрираните локални развојни планови согласно методолошките насоки и да се усогласи процесот на нивна подготовка, вклучително и улогите и учеството на општинските тимови, Министерството за локална самоуправа и Ресурсниот центар.
