Министерот за локална самоуправа, Златко Перински, оствари работна посета на Општина Охрид, при што одржа средба со градоначалникот Кирил Пецаков, членовите на Советот и општинската администрација.
На средбата се разговараше за тековните предизвици со кои се соочува општината, како и за конкретните решенија и проекти кои веќе се реализираат на терен.
Посебен акцент беше ставен на почетокот на реализацијата на проектот AdvenTour II, кој се спроведува во рамки на ИПА 3 програмата за прекугранична соработка со Република Грција, со буџет за Општина Охрид од 187.685 евра. Проектот има за цел да го унапреди пристапниот, инклузивен и одржлив туризам, преку инвестиции во инфраструктура и содржини достапни за сите граѓани.
Паралелно, преку Програмата за рамномерен регионален развој, обезбедена е поддршка за јавното комунално претпријатие со набавка на опрема за побрза детекција и санација на дефекти во водоводната мрежа, што ќе придонесе за поквалитетни услуги и намалување на загубите на вода.
Караванот „Каде што срцето е дома“ продолжува и во наредниот период, со цел креирање на политики базирани на реалните потреби на општините и граѓаните.
