Министерот за локална самоуправа, Златко Перински, и директорката на Агенцијата за иновации, научно-технолошки развој и претприемништво – ИНОВА, Даниела Димовска, договорија повеќе заеднички активности со кои ќе се поврзат општините, младите и приватниот сектор во областа на иновациите.
Преку Ресурсниот центар за поддршка на општините, кој претставува механизам за јакнење на локалните капацитети, општините ќе добијат полесен пристап до програмите и инструментите за поддршка што ги нуди ИНОВА, но и можност своите реални потреби да ги претворат во конкретни иновативни решенија.
Во рамки на соработката, двете институции заеднички ќе креираат јавни повици што ќе произлегуваат од потребите на општините. Преку своите грант-програми, ИНОВА ќе обезбедува финансиска поддршка за стартапи, иновативни компании и претприемачи кои ќе развиваат практични и применливи решенија за локалните предизвици.
Договорена е и реализацијата на програмата „Месеци на практиканство“, преку која студентите ќе имаат можност одблиску да се запознаат со функционирањето на локалната самоуправа. Истовремено, општините ќе добијат можност да вклучат млади луѓе кои со своето знаење, идеи и современи пристапи ќе можат да придонесат за унапредување на дел од административните процеси и услуги.
Во периодот што следи, Министерството за локална самоуправа и ИНОВА ќе продолжат со реализација на нови заеднички активности насочени кон јакнење на локалните капацитети, поголемо вклучување на младите и поттикнување на иновациите
во функција на развојот на општините.
