Ministri Xhaferri në konferencën “Demokracia dhe decentralizimi” në Zvicër

Ministri i vetqeverisjes lokale Musa Xhaferri, në kuadër të konferencës “Demokracia dhe Decentralizimit” që u mbajt në St. Gallen Zvicër, nga Departamenti Federal për punë të jashtme

të Zvicrës, Këshilli i Evropës dhe Universiteti i St. Gallen, trajtoi përvojën e Republikës së Maqedonisë në temën "Decentralizimi në shoqëritë multietnike”. Ministri Xhaferri transmetoi eksperiencën dhe sfidat e Republikës së Maqedonisë në këtë proces.

Për më tepër konferenca trajtoi katër tema të rëndësishme të procesit të decentralizimit, dhe atë: decentralizimi në shoqëritë multietnike, referendumi në nivel lokal dhe regjional, principi i subsidiaritetit, si dhe burimet dhe menaxhimi i buxhetit. Principi i subsidiaritetit dhe pjesëmarrja e qytetarëve në krijimin e politikave lokale u theksuan si elemente kyqe për përparimin dhe zhvillimin e decentralizimit, me çka krijimi i masave adekuate, që nënkupton përforcimin e monitorimit  dhe implementimit të procesit të decentralizimit u theksuan si të rëndësishme për zhvillim adekuat. “Ne mund të shkëmbejmë pikëpamjet tona me njëri-tjetrin duke diskutuar për ta, por ne nuk mund të marrim një sistem dhe ta aplikojmë atë në një vend tjetër, sepse çdo situatë është e ndryshme” theksoi Karl-Heinz Lambert nga Belgjika.  

Në margjinat e konferencës ministri Xhaferri realizoi takime të shumta me politikanë dhe ekspertë të shteteve evropiane, si: Andreas Gross, eurodeputet në Parlamentin Evropian, Josef Keller, kryetar i kantonit të St.Gallen, Jozef Marko, drejtor i qendrës për studime të Evropës juglindore,  Irune Aquirrezabal nga delegacioni i Baskëve, Spanjë, me përfaqësues nga delegacioni i Gjeorgjisë, Ukrainës, Belgjikës me të cilët përveç që ndanë eksperiencat dhe perspektivat për rrugën e procesit të decentralizimit, u dakorduan për bashkëpunime të ndërsjellta në këtë fushë. 

Promovimi i dialogut konstruktiv dhe shkëmbimi i përvojave në zbatimin e decentralizimit në shtetet anëtare të Këshillit të Evropës ishin qëllimet e konferencës, me të cilën bëri jehonë për rolin dhe rëndësinë e të gjithë subjekteve të përfshira në këtë proces.

Ministria për vetqeverisje lokale