Информативни форуми за проекти од ИПА Програмата за прекугранична соработка со Албанија

Во организација на Министерството за локална самоуправа, денеска во Охрид се одржува Информативен форум за изнаоѓање на партнери за проекти за прекугранична соработка

меѓу Република Македонија и Република Албанија,во рамките на вториот јавен повик за проектни предлози. Проектите ќе бидат финансирани со средства од ИПА Програмата на Европската Унија, наменети за прекугранична соработка.Информативните сесии се од отворен тип и на нив може да учествуваат сите заинтересирани субјекти.
Следните Информативни форуми ќе се организираат во Гостивар и во Прилеп, како и во Пешкопеа, Албанија. Во Албанија веќе се одржаа Информативни форуми, во Елбасан и во Корча.
 

Вториот јавен повик за проекти за прекугранична соработка меѓу Република Македонија и Република Албанија е објавен на 19-ти април и ќе биде отворен до 19-ти јули 2010 година.Од страна на Европската Унија за овој јавен повик се наменети вкупно 3 милиони и 525 илјади евра, од кои 2 милиони и 200 илјади се наменети за Република Македонија, а 1милион и 325 илјади  за Албанија.
 

Проектните предлози треба да се однесуваат на три области: Економски развој, со акцент на унапредувањето на туризмот, одржлив развој на животната средина, или конкретно заштита, унапредување и управување на природните богатства и екосистемите, како и социјална кохезија и културна размена.За проекти од  првите две области,  грантовите ќе изнесуваат минимум 50.000 а максимум 200 000 евра.За третата област, минимум 20.000, а максимум 50 000 евра.Во рамките на овој јавен повик можат да аплицираат општините, непрофитните организации и институции на локално и на регионално ниво, како и други субјекти.

Министерство за локална самоуправа