Министерот Џафери во посета на Центарот за регионален развој на Вардарскиот плански регион

Министерот за локална самоуправа, Муса Џафери, ја посети општина Велес и Центарот за регионален развој на Вардарскиот плански регион.

На средбата со градоначалниците од Вардарскиот плански регион, министерот Џафери го најави следниот јавен повик за проекти за регионален развој на почетокот на наредната година.

Задоволство ми е да истакнам дека при првиот јавен повик за финансирање на проекти за регионален развој, Вардарскиот плански регион обезбеди 19 милиони и двеста илјади денари за реализација на проектите за развој на регионот и за развој на селата. Овој регион,  покажа конкурентност со што за себе обезбеди 10,2 насто од вкупните средства за оваа намена.

Најголемиот дел од овие средства, скоро 17 милиони денари ќе бидат насочени кон развој на транзитниот и алтернативниот туризам, како и кон создавање на брендирани земјоделски производи,  проекти кои што произлегуваат од спецификите на овој регион.
Во оваа прилика сакам да најавам дека следниот јавен повик ќе биде објавен на почетокот на наредната година, рече министерот Џафери.
    

Претседателот на Вардарскиот плански регион, градоначалникот на Велес, Горан Петров, ги истакна предностите на регионот и неговата конкурентност, што му ја обезбедува централната географска позиција, автопатот, железничката пруга и течението на реката Вардар.
    

Директорот на Центарот на Вардарскиот плански регион, Александар Бузалков, ја промовираше Програмата за развој на планскиот регион за наредниот петгодишен период. На состанокот говореше и претставникот на УНДП, Михаела Стојковска, која ја истакна подготвеноста на УНДП да продолжи со поддршката на Центарот во јакнењето на капацитетите за спроведување на политтиката на регионален развој.

                    

      Министерство за локална самоуправа